Myunxenning «Bavariya» klubi birinchi o‘yindagi safar g‘alabasidan (2:1) so‘ng, Chempionlar Ligasi chorak finalida Madridning «Real» jamoasidan qiyinchiliksiz o‘tishi kerak. Bunday fikrni «Bavariya» sobiq himoyachisi va 1990 yilgi jahon chempioni Lotar Matteus bildirdi.

«So‘nggi yillarda, hatto o‘n yilliklar davomida Toni Kroos, Luka Modrich va Serxio Ramos kabi futbolchilar jamoaga o‘zgacha individuallik bag‘ishlar edi, hozir esa bu yo‘qolgan», — deya faxriy futbolchining so‘zlarini keltirmoqda Sky Sport.

Matteusning ta’kidlashicha, na Vinisius, na Jud Bellingem va na Killian Mbappeni hozircha jamoa yetakchilari deb atab bo‘lmaydi.

«Bavariya» va «Real» o‘rtasidagi javob uchrashuvi 15 aprel kuni bo‘lib o‘tadi. O‘yin Toshkent vaqti bilan tungi soat 00:00 da (16 aprelga o‘tar kechasi) boshlanadi.