Мюнхеннинг «Бавария» клуби биринчи ўйиндаги сафар ғалабасидан (2:1) сўнг, Чемпионлар Лигаси чорак финалида Мадриднинг «Реал» жамоасидан қийинчиликсиз ўтиши керак. Бундай фикрни «Бавария» собиқ ҳимоячиси ва 1990 йилги жаҳон чемпиони Лотар Маттеус билдирди.

«Сўнгги йилларда, ҳатто ўн йилликлар давомида Тони Кроос, Лука Модрич ва Серхио Рамос каби футболчилар жамоага ўзгача индивидуаллик бағишлар эди, ҳозир эса бу йўқолган», — дея фахрий футболчининг сўзларини келтирмоқда Sky Sport.

Маттеуснинг таъкидлашича, на Винисиус, на Жуд Беллингем ва на Киллиан Мбаппени ҳозирча жамоа етакчилари деб атаб бўлмайди.

«Бавария» ва «Реал» ўртасидаги жавоб учрашуви 15 апрель куни бўлиб ўтади. Ўйин Тошкент вақти билан тунги соат 00:00 да (16 апрелга ўтар кечаси) бошланади.