«Komo» ustozi Sesk Fabregas Italiya terma jamoasida ishlash borasidagi qarorini e’lon qildi. Avvalroq OAVda ispaniyalik mutaxassisning Italiya milliy jamoasi boshqaruviga kelishi haqida xabarlar tarqalgan edi.

Fabregas ayni damda Italiya terma jamoasini boshqarishga tayyor emasligini tan oldi. Mutaxassisning so‘zlariga ko‘ra, u klub futbolida ishlashni afzal ko‘radi, terma jamoadagi faoliyat esa u uchun zerikarli tuyuladi.

«Italiya terma jamoasini boshqarish? Balki qachondir buning iloji bo‘lar... Lekin hozir men murabbiylik ishiga juda qattiq sho‘ng‘iganman. Modomiki o‘zimni murabbiy deb atar ekanman, men har kuni maydonda futbolchilar bilan birga bo‘lishim, yosh o‘yinchilarni rivojlantirishim va o‘yinlarga tayyorgarlik ko‘rishim kerak. Milliy terma jamoadagi ish hozir men uchun biroz zerikarli ko‘rinmoqda. Ammo kelajakda, yoshim bir joyga yetganda, kim biladi deysiz...» — dedi Fabregas.

Yaqinda «Skuadra adzurra» JCH–2026 ga chiqa olmaganidan so‘ng, Jennaro Gattuzoni bosh murabbiylik lavozimidan ozod etgan edi. Italiya ketma-ket uchinchi bor mundialni o‘tkazib yubormoqda.