«Комо» устози Сеск Фабрегас Италия терма жамоасида ишлаш борасидаги қарорини эълон қилди. Аввалроқ ОАВда испаниялик мутахассиснинг Италия миллий жамоаси бошқарувига келиши ҳақида хабарлар тарқалган эди.
Фабрегас айни дамда Италия терма жамоасини бошқаришга тайёр эмаслигини тан олди. Мутахассиснинг сўзларига кўра, у клуб футболида ишлашни афзал кўради, терма жамоадаги фаолият эса у учун зерикарли туюлади.
«Италия терма жамоасини бошқариш? Балки қачондир бунинг иложи бўлар... Лекин ҳозир мен мураббийлик ишига жуда қаттиқ шўнғиганман. Модомики ўзимни мураббий деб атар эканман, мен ҳар куни майдонда футболчилар билан бирга бўлишим, ёш ўйинчиларни ривожлантиришим ва ўйинларга тайёргарлик кўришим керак. Миллий терма жамоадаги иш ҳозир мен учун бироз зерикарли кўринмоқда. Аммо келажакда, ёшим бир жойга етганда, ким билади дейсиз...» — деди Фабрегас.
Яқинда «Скуадра адзурра» ЖЧ–2026 га чиқа олмаганидан сўнг, Женнаро Гаттузони бош мураббийлик лавозимидан озод этган эди. Италия кетма-кет учинчи бор мундиални ўтказиб юбормоқда.
