Italiya grandi o‘z sardori bilan shartnomani uzaytirish arafasida turibdi.
Jurnalist Mirko Di Natalening xabar berishicha, «Yuventus» sport rahbariyati Manuel Lokatelli bilan yangi uzoq muddatli kelishuv imzolash bo‘yicha muzokaralarda ancha ilgarilab ketdi. Ayni damda tomonlar 2030 yilning iyun oyi oxirigacha yoki 2031 yilgacha mo‘ljallanadigan shartnomaning so‘nggi detallarini aniqlashtirishmoqda.
Qayd etilishicha, 28 yoshli Lokatelli shu haftaning o‘zidayoq «Yuve» bilan yangi shartnoma imzolashga tayyor. Shuningdek, mashhur insayder Fabrisio Romano ham ushbu ma’lumotni tasdiqladi.
Joriy mavsumda Manuel Lokatelli «Yuventus» safida barcha turnirlarda 41 ta o‘yinda maydonga tushib, 3 ta gol urdi va 2 ta golli uzatmani amalga oshirdi. Umumiy hisobda, uning «byankonerilar» tarkibidagi 224 ta o‘yinida 9 ta gol va 17 ta golli uzatma mavjud.
