Madridning «Real» klubi yozgi transfer oynasida asosiy jamoa hujumchilaridan biri bilan xayrlashishni rejalashtirmoqda. Jurnalist Lukas Navarretening «The Athletic» nashriga tayanib xabar berishicha, «qaymoqranglilar» mavsum yakunida ispaniyalik hujumchi Gonsalo Garsiyani sotib yuborishni ko‘zlamoqda.

Manbaning ta’kidlashicha, «Qirollik klubi» futbolchini to‘liq qo‘yib yubormoqchi emas. Klub o‘zining an’anaviy strategiyasiga sodiq qolgan holda, futbolchining transfer huquqlarining 50 foizini o‘zida saqlab qolmoqchi. Bu kelajakda uni qayta sotib olish yoki boshqa klubga sotilgan taqdirda summaning yarmini qo‘lga kiritish imkonini beradi.

Joriy mavsumda 22 yoshli Gonsalo Garsiya «Real Madrid» safida barcha turnirlarda 33 ta o‘yinda maydonga tushdi. Uning hisobida 6 ta gol va 2 ta golli uzatma mavjud. E’tiborlisi, u Ispaniya Superkubogi finalida «Barselona»ga qarshi bahsda (2:3) bitta gol va bitta assist qayd etishga muvaffaq bo‘lgan edi.

Gonsalo Garsiya 2025 yilda klub bilan 2030 yilgacha mo‘ljallangan shartnoma imzolagan bo‘lsa-da, rahbariyat uning doimiy o‘yin amaliyotiga ega bo‘lishi uchun boshqa klubga o‘tishi foydali deb hisoblamoqda. Hozirda unga APL va La Liganing bir necha klublari qiziqish bildirmoqda.