Мадриднинг «Реал» клуби ёзги трансфер ойнасида асосий жамоа ҳужумчиларидан бири билан хайрлашишни режалаштирмоқда. Журналист Лукас Наварретенинг «The Athletic» нашрига таяниб хабар беришича, «қаймоқранглилар» мавсум якунида испаниялик ҳужумчи Гонсало Гарсияни сотиб юборишни кўзламоқда.

Манбанинг таъкидлашича, «Қироллик клуби» футболчини тўлиқ қўйиб юбормоқчи эмас. Клуб ўзининг анъанавий стратегиясига содиқ қолган ҳолда, футболчининг трансфер ҳуқуқларининг 50 фоизини ўзида сақлаб қолмоқчи. Бу келажакда уни қайта сотиб олиш ёки бошқа клубга сотилган тақдирда сумманинг ярмини қўлга киритиш имконини беради.

Жорий мавсумда 22 ёшли Гонсало Гарсия «Реал Мадрид» сафида барча турнирларда 33 та ўйинда майдонга тушди. Унинг ҳисобида 6 та гол ва 2 та голли узатма мавжуд. Эътиборлиси, у Испания Суперкубоги финалида «Барселона»га қарши баҳсда (2:3) битта гол ва битта ассист қайд этишга муваффақ бўлган эди.

Гонсало Гарсия 2025 йилда клуб билан 2030 йилгача мўлжалланган шартнома имзолаган бўлса-да, раҳбарият унинг доимий ўйин амалиётига эга бўлиши учун бошқа клубга ўтиши фойдали деб ҳисобламоқда. Ҳозирда унга АПЛ ва Ла Лиганинг бир неча клублари қизиқиш билдирмоқда.