«Bavariya» bosh murabbiyi Vensan Kompani Chempionlar Ligasi doirasida «Real»ga qarshi kechadigan javob uchrashuvi haqida o‘z fikrlarini bildirdi.

«Biz «Real»ga katta hurmat bilan yondashamiz. Birinchi o‘yindan keyingi hissiyotlarimiz o‘zgargani yo‘q. Biz «Real»ning eng yaxshi talqiniga — xuddi «Manchester Siti»ga qarshi o‘yinlarda ko‘rganimizdek holatiga tayyorgarlik ko‘ryapmiz. «Real»ning so‘nggi natijalari ularda mavjud bo‘lgan iqtidor darajasini to‘liq aks ettirmaydi.

«Real» hamon Yevropaning eng kuchli jamoalari qatoriga kiradi. Ko‘plab klublarning aql bovar qilmas tarixi bor. Biz o‘z uyimizda «Inter»ga yutqazib qo‘yganimizda, Milanga keyingi bosqichga chiqishimizga ishongan holda yo‘l olgandik. Menimcha, hozir «Real» ham xuddi shuni his qilmoqda. Ammo biz ularga qanday muammo tug‘dirishni bilamiz. G‘alaba qozonishimizga ishonaman», — dedi Kompani jurnalistlarga.

«Bavariya» va «Real» o‘rtasidagi bahs chorshanba kuni, 15 aprel sanasida bo‘lib o‘tadi.