«Atletiko» o‘z maydonida «Barselona»ga 1:2 hisobida imkoniyatni boy berdi, biroq shunga qaramay, Chempionlar ligasi yarim finaliga yo‘l oldi. Ikki o‘yin natijasiga ko‘ra Diyego Simeone jamoasi 3:2 hisobida g‘alaba qozondi.

Shuni ta’kidlash joizki, ushbu natija bilan «Atletiko»ning Chempionlar ligasi pley-off bosqichi doirasidagi uy uchrashuvlarida davom etib kelayotgan uzoq yillik mag‘lubiyatsiz seriyasiga chek qo‘yildi. Bu seriya qariyb 30 yil — olis 1997 yildan beri davom etib kelayotgan edi. Ushbu davr mobaynida «matraschilar» o‘z uylarida 14 ta g‘alaba va 7 ta durang qayd etishgan.

Muhim jihati shundaki, penaltilar seriyasi bu statistikada hisobga olinmaydi. Masalan, o‘tgan mavsumda «Atletiko» o‘z uyida «Real»ni 1:0 hisobida mag‘lub etgan, ammo keyinchalik penaltilar seriyasida yutqazgan edi. O‘sha o‘yin g‘alaba sifatida qayd etilgan, garchi jamoa musobaqadan chiqib ketgan bo‘lsa-da. Statistika — mana shunday o‘ziga xos narsa.