«Bornmut» rahbariyati bosh murabbiy Andoni Iraolaning mavsum yakunida jamoani tark etish istagiga tezkorlik bilan munosabat bildirdi va unga allaqachon o‘rinbosar topib qo‘ydi. Bu haqda jurnalist Ben Jeykobs xabar bermoqda.

Uning ma’lumotlariga ko‘ra, germaniyalik mutaxassis Marko Roze Iraolaning o‘rnini egallash uchun asosiy nomzod bo‘lib turibdi. Tomonlar o‘rtasida muzokaralar bo‘lib o‘tgan va ular ancha muvaffaqiyatli kechgan. Shuningdek, «Bornmut» Kiran Makkennani taklif qilish variantini ham o‘rganib chiqqan, biroq bu variant katta xarajat talab qilgani bois amalga oshishi amrimahol bo‘lib ko‘rinmoqda.

Rozening so‘nggi ish joyi «RB Leypsig» bo‘lib, u yerdan 2025 yilning bahorida iste’foga chiqarilgan edi. Avvalroq u Dortmundning «Borussiya»si, Myonxengladbaxning «Borussiya»si va Avstriyaning «RB Zalsburg» klublarida faoliyat yuritgan. Murabbiylik faoliyati davomida Roze «Leypsig» bilan Germaniya Kubogi va Superkubogini qo‘lga kiritgan, shuningdek, uning hisobida «Zalsburg» bilan Avstriya chempionati va kubogidagi g‘alabalar ham mavjud.