«Борнмут» раҳбарияти бош мураббий Андони Ираоланинг мавсум якунида жамоани тарк этиш истагига тезкорлик билан муносабат билдирди ва унга аллақачон ўринбосар топиб қўйди. Бу ҳақда журналист Бен Жейкобс хабар бермоқда.
Унинг маълумотларига кўра, германиялик мутахассис Марко Розе Ираоланинг ўрнини эгаллаш учун асосий номзод бўлиб турибди. Томонлар ўртасида музокаралар бўлиб ўтган ва улар анча муваффақиятли кечган. Шунингдек, «Борнмут» Киран Маккеннани таклиф қилиш вариантини ҳам ўрганиб чиққан, бироқ бу вариант катта харажат талаб қилгани боис амалга ошиши амримаҳол бўлиб кўринмоқда.
Розенинг сўнгги иш жойи «РБ Лейпциг» бўлиб, у ердан 2025 йилнинг баҳорида истеъфога чиқарилган эди. Аввалроқ у Дортмунднинг «Боруссия»си, Мёнхенгладбахнинг «Боруссия»си ва Австриянинг «РБ Зальцбург» клубларида фаолият юритган. Мураббийлик фаолияти давомида Розе «Лейпциг» билан Германия Кубоги ва Суперкубогини қўлга киритган, шунингдек, унинг ҳисобида «Зальцбург» билан Австрия чемпионати ва кубогидаги ғалабалар ҳам мавжуд.
