Madridning «Real» klubi bosh murabbiyi Alvaro Arbeloa so‘nggi haftalar davomida bir necha bor hakamlikdan shikoyat qilgan edi. «Bavariya»ga qarshi kechgan javob o‘yinidan so‘ng madridliklar ustozi yana o‘z noroziligini bildirdi.
Arbeloaning fikricha, hakam 86-daqiqada Eduardo Kamavingaga ikkinchi sariq kartochkani ko‘rsatmasligi kerak edi.
«Hakam o‘yinni buzdi. Bunday harakat uchun futbolchini maydondan chetlatib bo‘lmaydi!» — deya Arbeloaning so‘zlarini The Touchline nashri keltirmoqda.
Kamavinga chetlatilganidan ko‘p o‘tmay, «Real» ikkita gol o‘tkazib yubordi va 4:3 hisobida mag‘lubiyatga uchradi. «Bavariya» va «Real» o‘rtasidagi bahsni sloveniyalik hakam Slavko Vinchich boshqarib bordi.
