«Liverpul» Ugo Ekitikeni uzoq muddatga yo‘qotdi, biroq uning o‘rniga qariyb to‘rt oyni o‘tkazib yuborgan Aleksandr Isak safga qaytdi. Shunga qaramay, shvesiyalik hujumchi hali to‘liq o‘yinlarni o‘tkazishga tayyor emas. Bu haqda «qizillar» bosh murabbiyi Arne Slot ma’lum qildi.
«Boshqa bir hujumchi jarohat olgan vaqtda, to‘rt oydan beri safdan chiqqan Isakning qaytishini bundan ham muvofiqroq ssenariyda tasavvur qilib bo‘lmasdi. Aleksning qaytgani yaxshi, albatta, lekin u hali 90 daqiqa o‘ynashga tayyor emasligini ham tushunib turibmiz», — dedi Slot matbuot anjumanida.
Aleksandr Isak oxirgi uchta o‘yinda maydonda mos ravishda 12, 21 va 45 daqiqa harakat qildi. Ko‘rinib turibdiki, shvesiyalik futbolchining o‘yin vaqti bosqichma-bosqich oshib bormoqda.
