Italiyaning «Komo» klubi bosh yulduzi hisoblangan hujumkor yarim himoyachi Niko Pas shu yozda bo‘lib o‘tadigan jahon chempionati haqida o‘z fikrlarini bildirdi.
«Men jahon chempionatini televizor orqali tomosha qilgan paytlarimdan beri unda ishtirok etishni orzu qilaman. Bu men uchun aql bovar qilmaydigan voqea bo‘lardi. U yerga borish uchun har kuni o‘z ustimda ishlayapman», — deya argentinalik futbolchining so‘zlarini keltiradi Sportmediaset.
Joriy mavsumda 21 yoshli xavbek barcha musobaqalarda 35 ta o‘yinda ishtirok etib, 12 ta gol va 7 ta golli uzatmani o‘z hisobiga yozdirib qo‘ydi.
Mundial 11 iyundan 19 iyulga qadar AQSH, Meksika va Kanada maydonlarida bo‘lib o‘tadi. Guruh bosqichida Argentina terma jamoasi Jazoir, Avstriya va Iordaniyaga qarshi bahs olib boradi.
