Италиянинг «Комо» клуби бош юлдузи ҳисобланган ҳужумкор ярим ҳимоячи Нико Пас шу ёзда бўлиб ўтадиган жаҳон чемпионати ҳақида ўз фикрларини билдирди.
«Мен жаҳон чемпионатини телевизор орқали томоша қилган пайтларимдан бери унда иштирок этишни орзу қиламан. Бу мен учун ақл бовар қилмайдиган воқеа бўларди. У ерга бориш учун ҳар куни ўз устимда ишлаяпман», — дея аргентиналик футболчининг сўзларини келтиради Sportmediaset.
Жорий мавсумда 21 ёшли хавбек барча мусобақаларда 35 та ўйинда иштирок этиб, 12 та гол ва 7 та голли узатмани ўз ҳисобига ёздириб қўйди.
Мундиал 11 июндан 19 июлга қадар АҚШ, Мексика ва Канада майдонларида бўлиб ўтади. Гуруҳ босқичида Аргентина терма жамоаси Жазоир, Австрия ва Иорданияга қарши баҳс олиб боради.
