«Barselona» bosh murabbiyi Xans-Diter Flik kelasi yozgi transfer oynasi uchun klubning ustuvor vazifalarini belgilab berdi. Bu haqda Sport.es xabar berdi.

Manbaga ko‘ra, nemis mutaxassisi «Barselona» akademiyasi — La Masiya ishidan va yosh futbolchilar rivojidan mamnun. Biroq u jamoada 26–28 yosh oralig‘idagi, liderlikni o‘z zimmasiga ola oladigan futbolchilar yetishmayotganini ta’kidlamoqda.

Flik fikricha, aynan shu toifadagi futbolchilar yoshlar va tajribali o‘yinchilar o‘rtasida ko‘prik vazifasini bajarishi kerak. Bu esa ayniqsa Chempionlar ligasida g‘alaba uchun kurashda muhim hisoblanadi — «Barselona» 2015 yildan beri ushbu sovrinni qo‘lga kiritmagan.

Shu sababli klub nafaqat saviyani oshiradigan, balki g‘alaba mentaliteti va yetakchilik qobiliyatini olib kiradigan futbolchilarni jamoaga qo‘shishni rejalashtirmoqda.

Parallel ravishda Xans-Diter Flik bilan shartnomani uzaytirish bo‘yicha muzokaralar ham davom etmoqda. Uning agenti Pini Zaxavi Barselonaga tashrif buyurib, tomonlar 2028 yilgacha shartnomani uzaytirish bo‘yicha og‘zaki kelishuvga erishgan. Rasmiy imzo mavsum yakunlangach qo‘yilishi kutilmoqda.