«Inter Mayami» hujumchisi Lionel Messi MLS doirasida «Kolorado»ga qarshi kechgan o‘yindan so‘ng o‘z taassurotlari bilan o‘rtoqlashdi. Argentinalik futbolchining jamoasi safarda 3:2 hisobida g‘alaba qozondi, hujumchining o‘zi esa dubl qayd etdi.

Messi uchrashuvning 18-daqiqasida penaltini aniq amalga oshirib, hisobni ochdi. Ikkinchi golini esa Lionel 79-daqiqada raqib darvozasiga kiritdi. Endilikda hujumchining faoliyati davomida urgan gollari soni 905 taga yetdi.

«Muhim g‘alaba va maydondagi ajoyib muhit», — deb yozdi Messi ijtimoiy tarmoqlardagi sahifasida.

Ushbu g‘alabadan so‘ng «Inter Mayami» MLS Sharqiy konferensiyasida 10 ochko bilan uchinchi o‘rinni egallab turibdi. Keyingi turda «pushtiranglilar» «Real Solt-Leyk» klubiga qarshi maydonga tushadilar. Ushbu bahs 23 aprel kuni bo‘lib o‘tadi.