«Интер Майами» ҳужумчиси Лионель Месси МЛС доирасида «Колорадо»га қарши кечган ўйиндан сўнг ўз таассуротлари билан ўртоқлашди. Аргентиналик футболчининг жамоаси сафарда 3:2 ҳисобида ғалаба қозонди, ҳужумчининг ўзи эса дубль қайд этди.
Месси учрашувнинг 18-дақиқасида пенальтини аниқ амалга ошириб, ҳисобни очди. Иккинчи голини эса Лионель 79-дақиқада рақиб дарвозасига киритди. Эндиликда ҳужумчининг фаолияти давомида урган голлари сони 905 тага етди.
«Муҳим ғалаба ва майдондаги ажойиб муҳит», — деб ёзди Месси ижтимоий тармоқлардаги саҳифасида.
Ушбу ғалабадан сўнг «Интер Майами» МЛС Шарқий конференциясида 10 очко билан учинчи ўринни эгаллаб турибди. Кейинги турда «пуштиранглилар» «Реал Солт-Лейк» клубига қарши майдонга тушадилар. Ушбу баҳс 23 апрель куни бўлиб ўтади.
