Madridning «Atletiko» klubi Ispaniya Kubogi finalida «Real Sosyedad»dan qabul qilingan mag‘lubiyatdan so‘ng o‘z muxlislariga ta’sirli murojaat yo‘lladi. Ushbu uchrashuvning asosiy vaqti 2:2 hisobida yakunlangan bo‘lsa, penaltilar seriyasida «matraschilar» 3:4 hisobida imkoniyatni boy berishdi.
«Biz oxirigacha kurashdik va kutilgan natijaga erisha olmagan bo‘lsak-da, Sevilya, Madrid va dunyoning barcha burchaklaridan sizning qo‘llab-quvvatlashingizni his qilishdan to‘xtamadik. Bu yo‘lni siz bilan birga bosib o‘tish biz uchun katta sharaf. Doimo birgamiz», — deyiladi «Atletiko»ning X ijtimoiy tarmog‘idagi rasmiy sahifasida qoldirilgan xabarda.
Ma’lumot uchun, uchrashuvning asosiy vaqtida madridliklar safida hujumchilar Ademola Lukman va Xulian Alvares gol muallifiga aylanishgan edi.
