Fransiya terma jamoasi bosh murabbiyi yordamchisi Gi Stefan Ugo Ekitikening jarohati haqida o‘z fikrini bildirdi. «Liverpul» hujumchisi Chempionlar ligasi doirasidagi «PSJ»ga qarshi o‘yinda axill payidan jarohat olib, uzoq muddatga safdan chiqdi.

«Birinchi navbatda, boshqa yomon xabar eshitmaymiz deb umid qilamiz. Bu Fransiya terma jamoasi uchun og‘ir zarba va katta yo‘qotish. Unga o‘xshash futbolchilar boshqa yo‘q», — deya Stefanning so‘zlaridan iqtibos keltiradi Ouest-France.

«U tarkibda bo‘lishini his qilayotgandi, ammo bir necha soniya ichida hammasi barbod bo‘ldi. Biz bu bilan kelishishimiz va uning yo‘qligini to‘ldirishga harakat qilishimiz kerak», — deya qo‘shimcha qildi murabbiy.

Joriy mavsumda 23 yoshli futbolchi klub miqyosida 45 ta o‘yinda ishtirok etib, 17 ta gol urdi va 6 ta golli uzatmani amalga oshirdi. L'Equipe nashrining baholashicha, Ekitikening tiklanishi 9 oygacha vaqt olishi mumkin. Jahon chempionatining guruh bosqichida uning jamoasi Iroq, Senegal va Norvegiya bilan o‘ynaydi.