Франция терма жамоаси бош мураббийи ёрдамчиси Ги Стефан Уго Экитикенинг жароҳати ҳақида ўз фикрини билдирди. «Ливерпуль» ҳужумчиси Чемпионлар лигаси доирасидаги «ПСЖ»га қарши ўйинда ахилл пайидан жароҳат олиб, узоқ муддатга сафдан чиқди.

«Биринчи навбатда, бошқа ёмон хабар эшитмаймиз деб умид қиламиз. Бу Франция терма жамоаси учун оғир зарба ва катта йўқотиш. Унга ўхшаш футболчилар бошқа йўқ», — дея Стефаннинг сўзларидан иқтибос келтиради Ouest-France.

«У таркибда бўлишини ҳис қилаётганди, аммо бир неча сония ичида ҳаммаси барбод бўлди. Биз бу билан келишишимиз ва унинг йўқлигини тўлдиришга ҳаракат қилишимиз керак», — дея қўшимча қилди мураббий.

Жорий мавсумда 23 ёшли футболчи клуб миқёсида 45 та ўйинда иштирок этиб, 17 та гол урди ва 6 та голли узатмани амалга оширди. L'Equipe нашрининг баҳолашича, Экитикенинг тикланиши 9 ойгача вақт олиши мумкин. Жаҳон чемпионатининг гуруҳ босқичида унинг жамоаси Ироқ, Сенегал ва Норвегия билан ўйнайди.