Madridning «Atletiko» klubi vinger Niko Gonsales bo‘yicha «Yuventus»dan narxni tushirishni talab qilmoqchi. Football Italia nashrining ta’kidlashicha, ikkala tomon ehtimoliy xarid shartlari bo‘yicha kelishib bo‘lgan, biroq hozirgi narx «matraschilar» uchun juda yuqori tuyulmoqda.
Niko Gonsales ma’lum shartlar bajarilgan taqdirda 32 million yevroga sotib olish majburiyati bilan madridliklar safida ijarada to‘p tepmoqda. Unga ko‘ra, futbolchi joriy mavsum La Liganing kamida 21 ta o‘yinida 45 daqiqadan kam bo‘lmagan vaqt davomida maydonda harakat qilishi kerak.
Hozirgi vaqtga kelib, Niko Gonsales La Ligada 22 ta o‘yin o‘tkazib, 3 ta gol urdi, biroq u faqat 15 ta uchrashuvdagina belgilangan vaqt davomida o‘ynagan. «Atletiko»ning 2025-26 yilgi mavsumda bor-yo‘g‘i 7 ta o‘yini qolganini hisobga olsak, sotib olish majburiyati haqidagi band faollashmaslik ehtimoli yuqori.
