Мадриднинг «Атлетико» клуби вингер Нико Гонсалес бўйича «Ювентус»дан нархни туширишни талаб қилмоқчи. Football Italia нашрининг таъкидлашича, иккала томон эҳтимолий харид шартлари бўйича келишиб бўлган, бироқ ҳозирги нарх «матрасчилар» учун жуда юқори туюлмоқда.
Нико Гонсалес маълум шартлар бажарилган тақдирда 32 миллион еврога сотиб олиш мажбурияти билан мадридликлар сафида ижарада тўп тепмоқда. Унга кўра, футболчи жорий мавсум Ла Лиганинг камида 21 та ўйинида 45 дақиқадан кам бўлмаган вақт давомида майдонда ҳаракат қилиши керак.
Ҳозирги вақтга келиб, Нико Гонсалес Ла Лигада 22 та ўйин ўтказиб, 3 та гол урди, бироқ у фақат 15 та учрашувдагина белгиланган вақт давомида ўйнаган. «Атлетико»нинг 2025-26 йилги мавсумда бор-йўғи 7 та ўйини қолганини ҳисобга олсак, сотиб олиш мажбурияти ҳақидаги банд фаоллашмаслик эҳтимоли юқори.
