«Bavariya» faxriy prezidenti Uli Xyoness Myunxen klubi 35-bor Germaniya chempioni bo‘lganidan so‘ng jamoa bosh murabbiyi Vensan Kompanining mehnatini alohida e’tirof etdi.

«Bavariya» tarixida jamoa hech qachon hozirgidek jipslashmagan edi. Bu jamoada mutlaqo guruhbozlik yo‘q. Bu nafaqat futbolchilarga, balki butun murabbiylar shtabi, fizioterapevtlar, shuningdek, Maks Eberl va Kristof Froyndga ham tegishli.

Biz Vensan Kompanini tayinlaganimizda hamma: «Angliyada quyi ligaga tushib ketgan jamoadan kelgan odam qanday qilib «Bavariya»ni boshqarishi mumkin?» deb o‘ylagandi. Ko‘pchilik uning buni uddalay olishiga ishonmagan edi.

Biz Vensan, uning otasi, Gerbert Xayner, Maks Eberl va Kristof Froynd bilan tushlikda uchrashdik. Yarim soatdan keyin stol tagidan Maksning tizzasidan tutib, unga «layk» (katta barmoq yuqoriga) ishorasini ko‘rsatdim. Aynan o‘shanda hammasi yaxshi bo‘lishini va Vensan biz uchun mos inson ekanligini tushundim va his qildim.

Vensan o‘z tahlillari markaziga «mehnat» so‘zini qo‘ydi. Bu menga juda yoqdi va bu mamlakatimiz uchun yaxshi namuna bo‘la oladi. Ba’zilar hamma narsaga kamroq kuch sarflab erishish mumkin deb o‘ylashadi, lekin bu mutlaqo noto‘g‘ri.

Vensan har kuni ertalab soat 7:30 da ishga keladi va kechqurun eng oxirgilardan bo‘lib ketadi. Uning bundan zavqlanayotgani ko‘rinib turibdi va biror futbolchi jarohat olganida u hech qachon nolimagan. U bu yerdagi har bir futbolchini, hatto Harri Keynni ham yaxshiroq qildi — haqiqiy mahorat mana shunda», — dedi Uli Xyoness Bild nashriga bergan intervyusida.