Turkiyaning «Fenerbaxche» klubi braziliyalik darvozabon Ederson Morayesning xizmatlaridan voz kechish imkoniyatlarini ko‘rib chiqmoqda. Bu haqda Turkiyaning «Sabah» nashri xabar bermoqda.

2025 yilning sentyabr oyida «Manchester Siti»dan sotib olingan 32 yoshli posbon so‘nggi paytlarda keskin tanqidlarga uchramoqda. Xususan, uning «Rizespor»ga qarshi kechgan bahsdagi (2:2) ishonchsiz harakatlari klub rahbariyatining u bilan xayrlashish istagini yanada kuchaytirgan.

Biroq, futbolchining transferi borasida moliyaviy to‘siqlar mavjud. Ma’lumotlarga ko‘ra, Edersonning yillik ish haqi 11 million yevroni tashkil etadi. Yevropaning yetakchi klublaridan biri darvozabonni o‘z safiga qo‘shib olmoqchi bo‘lgan, ammo futbolchi maoshining 3 million yevrogacha tushirilishiga rozi bo‘lmagani sababli muzokaralar to‘xtab qolgan.

Ma’lumot uchun, Ederson joriy mavsumda «Fenerbaxche» safida 34 ta uchrashuvda maydonga tushib, o‘z darvozasidan 33 ta to‘p olib chiqdi. U 13 ta o‘yinda darvozasi daxlsizligini saqlab qolgan. Uning klub bilan amaldagi shartnomasi 2028 yilga qadar mo‘ljallangan bo‘lib, uni yana bir yilga uzaytirish imkoniyati ham mavjud.