«Etihad»da «Manchester Siti»dan qabul qilingan mag‘lubiyat nafaqat taktik, balki ruhiy jihatdan ham chempionlik poygasida burilish nuqtasi bo‘ldi. «Arsenal»da hali imkoniyat bor, ammo jamoa ikkita jiddiy muammoga duch keldi.

1. Hujumda «qotil» yetishmasligi

Hal qiluvchi pallada «Arsenal»da imkoniyatdan foydalana oladigan futbolchi topilmadi. Xavers Donnarummaning xatosidan so‘ng gol urgan bo‘lsa-da, o‘yinning qo‘shimcha vaqtida hisobni tenglashtirish uchun eng qulay imkoniyatni qo‘ldan chiqardi — uning bosh bilan yo‘llagan zarbasi to‘sin yuqorisidan o‘tib ketdi.

«Siti»da esa bunday futbolchi bor: Erling Holand. 2026 yilda APLda atigi 3 ta gol urgan va 11 fevraldan beri sukut saqlayotgan hujumchi aynan kerakli paytda qaytdi. Uning Gabriel ustidan qilgan finti va aniq zarbasi «shaharliklar»ga g‘alaba keltirdi.

2. Hal qiluvchi daqiqalardagi tajribasizlik

«Siti» chempionlarga xos sovuqqonlikni namoyish etdi. Kelasi yozda jamoani tark etadigan Bernardu Silva mavsumdagi eng yaxshi o‘yinlaridan birini o‘tkazdi, Rodri esa tempni to‘liq nazorat qildi.

«Arsenal»da esa bunday ruhiy barqarorlik sezilmayapti. Klub ichidagi gaplarga qaraganda, ular chempion bo‘lmaguncha «g‘oliblik mentaliteti»ni shakllantira olishmayapti. Bu esa yopiq doirani eslatadi: titul yutish uchun mentalitet kerak, mentalitet uchun esa titul.

Bu nega ayniqsa og‘riqli?

«Arsenal» APLda ketma-ket ikkita o‘yinda yutqazdi (bungacha 49 o‘yinda atigi 3 bor mag‘lub bo‘lgandi).

Olti ochkolik farq eng noqulay paytda yo‘qqa chiqdi.

Agar chorshanba kuni «Siti» «Byornli»ni yengsa, londonliklar birinchi o‘rinni boy berishadi. Gvardiola jamoasi aprel-may oylarida odatda eng yaxshi formasiga kiradi.