«Этиҳад»да «Манчестер Сити»дан қабул қилинган мағлубият нафақат тактик, балки руҳий жиҳатдан ҳам чемпионлик пойгасида бурилиш нуқтаси бўлди. «Арсенал»да ҳали имконият бор, аммо жамоа иккита жиддий муаммога дуч келди.
1. Ҳужумда «қотил» етишмаслиги
Ҳал қилувчи паллада «Арсенал»да имкониятдан фойдалана оладиган футболчи топилмади. Хаверц Доннарумманинг хатосидан сўнг гол урган бўлса-да, ўйиннинг қўшимча вақтида ҳисобни тенглаштириш учун энг қулай имкониятни қўлдан чиқарди — унинг бош билан йўллаган зарбаси тўсин юқорисидан ўтиб кетди.
«Сити»да эса бундай футболчи бор: Эрлинг Ҳоланд. 2026 йилда АПЛда атиги 3 та гол урган ва 11 февралдан бери сукут сақлаётган ҳужумчи айнан керакли пайтда қайтди. Унинг Габриэль устидан қилган финти ва аниқ зарбаси «шаҳарликлар»га ғалаба келтирди.
2. Ҳал қилувчи дақиқалардаги тажрибасизлик
«Сити» чемпионларга хос совуққонликни намойиш этди. Келаси ёзда жамоани тарк этадиган Бернарду Силва мавсумдаги энг яхши ўйинларидан бирини ўтказди, Родри эса темпни тўлиқ назорат қилди.
«Арсенал»да эса бундай руҳий барқарорлик сезилмаяпти. Клуб ичидаги гапларга қараганда, улар чемпион бўлмагунча «ғолиблик менталитети»ни шакллантира олишмаяпти. Бу эса ёпиқ доирани эслатади: титул ютиш учун менталитет керак, менталитет учун эса титул.
Бу нега айниқса оғриқли?
«Арсенал» АПЛда кетма-кет иккита ўйинда ютқазди (бунгача 49 ўйинда атиги 3 бор мағлуб бўлганди).
Олти очколик фарқ энг ноқулай пайтда йўққа чиқди.
Агар чоршанба куни «Сити» «Бёрнли»ни енгса, лондонликлар биринчи ўринни бой беришади. Гвардиола жамоаси апрель-май ойларида одатда энг яхши формасига киради.
