Madridning «Real» klubi bosh murabbiyi Alvaro Arbeloa Yevropa Chempionlar Ligasi chorak finali doirasida «Bavariya»ga qarshi kechgan bahsdan so‘ng jamoa atrofidagi muhit va o‘z rejalari haqida to‘xtaldi.
Eslatib o‘tamiz, 15 aprel kuni bo‘lib o‘tgan javob uchrashuvida madridliklar myunxenliklarga 3:4 hisobida imkoniyatni boy berib, musobaqadagi ishtiroklarini to‘xtatgan edi. Shundan so‘ng murabbiy jamoadagi holati va muxlislarning munosabati haqida quyidagilarni ta’kidladi:
— Men o‘zimni juda yaxshi his qilyapman. Kuch-quvvat, g‘ayrat va ambisiyalarga to‘laman. Ushbu lavozimda ekanman, shunday bo‘lib qoladi. Men uyda o‘tiradiganlar toifasidan emasman. Tashqariga chiqqanimda «Real» muxlislarining jamoamiz «Bavariya»ga qarshi ko‘rsatgan o‘yini, futbolchilarning fidoiyligi va sa’y-harakatlaridan faxrlanayotganini his qildim, — dedi Arbeloa.
Shuningdek, mutaxassis uchrashuvdagi ayrim omillar va natijaga bo‘lgan munosabatini yashirib o‘tirmadi:
— Hozirda ko‘chalarda bizni yarim finalga chiqish yoki bu o‘rin uchun kurashish imkoniyatidan mahrum qilishgan, degan tuyg‘u hukm surmoqda. Shaxsan men ham aynan shunday fikrdaman va vaziyatni shunday his qilyapman, — deya qo‘shimcha qildi murabbiy.
