Мадриднинг «Реал» клуби бош мураббийи Алваро Арбелоа Европа Чемпионлар Лигаси чорак финали доирасида «Бавария»га қарши кечган баҳсдан сўнг жамоа атрофидаги муҳит ва ўз режалари ҳақида тўхталди.

Эслатиб ўтамиз, 15 апрель куни бўлиб ўтган жавоб учрашувида мадридликлар мюнхенликларга 3:4 ҳисобида имкониятни бой бериб, мусобақадаги иштирокларини тўхтатган эди. Шундан сўнг мураббий жамоадаги ҳолати ва мухлисларнинг муносабати ҳақида қуйидагиларни таъкидлади:

— Мен ўзимни жуда яхши ҳис қиляпман. Куч-қувват, ғайрат ва амбицияларга тўламан. Ушбу лавозимда эканман, шундай бўлиб қолади. Мен уйда ўтирадиганлар тоифасидан эмасман. Ташқарига чиққанимда «Реал» мухлисларининг жамоамиз «Бавария»га қарши кўрсатган ўйини, футболчиларнинг фидоийлиги ва саъй-ҳаракатларидан фахрланаётганини ҳис қилдим, — деди Арбелоа.

Шунингдек, мутахассис учрашувдаги айрим омиллар ва натижага бўлган муносабатини яшириб ўтирмади:

— Ҳозирда кўчаларда бизни ярим финалга чиқиш ёки бу ўрин учун курашиш имкониятидан маҳрум қилишган, деган туйғу ҳукм сурмоқда. Шахсан мен ҳам айнан шундай фикрдаман ва вазиятни шундай ҳис қиляпман, — дея қўшимча қилди мураббий.