«Yuventus» bosh murabbiyi Luchano Spalletti Italiya A Seriyasi 33-turidan o‘rin olgan «Bolonya»ga qarshi o‘yindan (2:0) so‘ng o‘z fikrlari bilan o‘rtoqlashdi.

«Boshqa natijalarni hisobga olsak, bizga aslo tempni tushirish mumkin emas edi. Natijalarimizdan qat’i nazar, jadvaldagi o‘rnimizni saqlab qolishimizni bilardik, ammo bu tavakkalchilik edi. Shu sababli o‘yin boshidanoq kerakli kayfiyatni sozlab olishimiz va undan chekinmasligimiz lozim edi.

«Bolonya» uchun safarlar va Yevropa Ligasidagi ishtirok tufayli hafta og‘ir kelganini bilardik. Agar o‘yin shiddatini saqlab qolsak, bu bizga katta ustunlik berishini tushunib turgandik. Hamma juda yaxshi o‘ynadi va biz tezkor gol urdik. Ba’zida raqib bizga bosim o‘tkazdi, lekin Vinchenso Italyano boshqaruvidagi kuchli jamoa bilan o‘yinda bu tabiiy hol.

Albatta, hozir mas’uliyat va bosim yuqori, biroq jamoa yaxshi futbol o‘ynashga harakat qilmoqda. Futbolchilar bir-birlariga g‘amxo‘rlik qilishmoqda va yordam berishga tayyor — bu murabbiy uchun juda muhim. Biz to‘g‘ri yo‘ldamiz va har kuni jamoada yangi ijobiy o‘zgarishlarni ko‘ryapman, shu bois shu ruhda davom etishni istaymiz», — deya Spallettining so‘zlarini keltiradi Football Italia.

«Yuventus» 63 ochko bilan 4-o‘rinda bormoqda. «Bolonya» esa 33 o‘yindan so‘ng 48 ochko bilan 8-pog‘onani egallab turibdi.