«Ювентус» бош мураббийи Лучано Спаллетти Италия А Серияси 33-туридан ўрин олган «Болонья»га қарши ўйиндан (2:0) сўнг ўз фикрлари билан ўртоқлашди.

«Бошқа натижаларни ҳисобга олсак, бизга асло темпни тушириш мумкин эмас эди. Натижаларимиздан қатъи назар, жадвалдаги ўрнимизни сақлаб қолишимизни билардик, аммо бу таваккалчилик эди. Шу сабабли ўйин бошиданоқ керакли кайфиятни созлаб олишимиз ва ундан чекинмаслигимиз лозим эди.

«Болонья» учун сафарлар ва Европа Лигасидаги иштирок туфайли ҳафта оғир келганини билардик. Агар ўйин шиддатини сақлаб қолсак, бу бизга катта устунлик беришини тушуниб тургандик. Ҳамма жуда яхши ўйнади ва биз тезкор гол урдик. Баъзида рақиб бизга босим ўтказди, лекин Винченцо Итальяно бошқарувидаги кучли жамоа билан ўйинда бу табиий ҳол.

Албатта, ҳозир масъулият ва босим юқори, бироқ жамоа яхши футбол ўйнашга ҳаракат қилмоқда. Футболчилар бир-бирларига ғамхўрлик қилишмоқда ва ёрдам беришга тайёр — бу мураббий учун жуда муҳим. Биз тўғри йўлдамиз ва ҳар куни жамоада янги ижобий ўзгаришларни кўряпман, шу боис шу руҳда давом этишни истаймиз», — дея Спаллеттининг сўзларини келтиради Football Italia.

«Ювентус» 63 очко билан 4-ўринда бормоқда. «Болонья» эса 33 ўйиндан сўнг 48 очко билан 8-поғонани эгаллаб турибди.