«Manchester Yunayted» va Angliya terma jamoasi sobiq hujumchisi Ueyn Runi Londonning «Arsenal» klubi ishqibozlarining xatti-harakatlarini tanqid ostiga oldi.

Angliya Premyer-ligasining so‘nggi turida Mikel Arteta shogirdlari «Manchester Siti» jamoasiga 1:2 hisobida imkoniyatni boy berdi. Ushbu muvaffaqiyatsizlikdan so‘ng muxlislar tomonidan bildirilayotgan e’tirozlarga munosabat bildirgan Runi quyidagilarni ta’kidladi:

— Menimcha, «Arsenal» muxlislari o‘z jamoasini yanada faolroq qo‘llab-quvvatlashlari kerak. Men ularning «Bornmut»ga qarshi o‘yinda o‘z futbolchilarini hushtakbozlik bilan kutib olganlarini ko‘rdim. Vaholanki, jamoa butun mavsum davomida ajoyib o‘yin ko‘rsatdi, hozirda esa ularda shunchaki kichik pasayish kuzatilmoqda, xolos.

Shuningdek, sobiq futbolchi «Manchester Yunayted» muxlislarini namuna sifatida ko‘rsatib o‘tdi:

— «Manchester Yunayted» Erik ten Xag va keyinchalik Ruben Amorim boshqaruvi davrida og‘ir damlarni boshidan o‘tkazdi. Biroq muxlislar har doim murabbiylarni qo‘llab-quvvatlab, tribunalardan turib ularga dalda berishdi va deyarli hech qachon hushtakbozlik qilish darajasiga borishmadi, — dedi U. Runi.

Ma’lumot uchun, ayni paytda «Arsenal» 70 ochko bilan APL turnir jadvalida peshqadamlik qilmoqda. Ikkinchi o‘rinda borayotgan «Manchester Siti» hisobida 67 ochko mavjud bo‘lib, «shaharliklar» ixtiyorida yana bitta zaxira o‘yini bor.