Serbiyalik tennischi 860 hafta davomida ATP reytingining kuchli beshligidan o‘rin oldi va shveysariyalik Rojer Federerning natijasini ortda qoldirdi.

Tennis bo‘yicha “Katta dubulg‘a” turnirlarining 24 karra g‘olibi Novak Jokovich 860 hafta (16 yildan ko‘proq vaqt) davomida ATP reytingining yuqori beshligida bo‘lib, yangi rekord qayd etdi. Avvalgi rekord Rojer Federerga tegishli edi (859 hafta). Kuchli uchlikni ispaniyalik Rafael Nadal yakunlab bergan (837 hafta).

Jokovich ushbu davr mobaynida reytingda quyidagi o‘rinlarni egallagan:

1-o‘rin: 428 hafta
2-o‘rin: 171 hafta
3-o‘rin: 165 hafta
4-o‘rin: 59 hafta
5-o‘rin: 37 hafta

Ma’lumot o‘rnida, Jokovich so‘nggi uchta "Masters" seriyasiga kiruvchi turnirlarni o‘tkazib yubordi. Qayd etilishicha, u musobaqalar grafigini optimallashtirish maqsadida ayrim turnirlarda qatnashmaslikka qaror qilgan.

Hozirda 38 yoshli Jokovich ATP reytingida 4-o‘rinni egallab turibdi. U faoliyati davomida 101 ta titulni qo‘lga kiritgan bo‘lib, ulardan 24 tasi “Katta dubulg‘a” turnirlari hisoblanadi (erkaklar o‘rtasidagi rekord natija). Shuningdek, u 2024 yilgi Parij Olimpiadasining oltin, 2008 yilgi Pekin Olimpiadasining bronza medali sohibi va Devis kubogi (2010) g‘olibi bo‘lgan. Serbiyalik tennischi jahonning birinchi raketkasi sifatida ATP reytingini boshqarish bo‘yicha ham mutlaq rekordchi hisoblanadi.