The Times nashrining xabariga ko‘ra, agar Germaniya klubi kamida 75 million funt taklif qilsa, «Nyukasl» Entoni Gordonning «Bavariya»ga transferi bo‘yicha muzokaralarni boshlashga tayyor.

Avvalroq, vinger o‘z yaqinlariga Myunxen jamoasiga o‘tishga tayyor ekanligini ma’lum qilgani haqida xabarlar paydo bo‘lgan edi.

«Bavariya» 25 yoshli futbolchini shu yozgi transfer oynasidagi asosiy xaridlardan biri sifatida ko‘rmoqda. «Nyukasl» bu qiziqishdan xabardor, biroq hozircha klublar o‘rtasida rasmiy aloqa o‘rnatilmagan. Shuningdek, Gordonning o‘zi ham ushbu transferga ijobiy qarayotgani aytilmoqda.

«Bavariya» Gordonni dastlab taxminan 55 million funtga baholagan edi, ammo «Nyukasl» faqat boshlang‘ich narx 75 millionga ko‘tarilgan taqdirdagina kelishuvni muhokama qilishga tayyor.

Hozirgi bosqichda «Bavariya» Gordon uchun kurashda yaqqol favorit bo‘lib turibdi va bu borada avvalroq futbolchiga qiziqish bildirgan «Liverpul» hamda «Arsenal»ni ortda qoldirmoqda. Tez orada Gordonning agentlari «Bavariya» vakillari bilan uchrashishi mumkin.

Joriy mavsumda Entoni APLda 26 ta o‘yin o‘tkazib, 6 ta gol urdi va 2 ta golli uzatmani amalga oshirdi.