Braziliya terma jamoasi va «Milan» klubi sobiq himoyachisi Kafu Myunxenning «Bavariya» klubi namoyish etayotgan o‘yin uslubiga yuqori baho berdi. Bu haqda Bayern & Germany nashri xabar bermoqda.
Afsonaviy futbolchi nemis grandining hujumkor futbolidan hayratda ekanini yashirmadi:
«Bugungi «Bavariya» — futbol san’atida butun dunyo uchun namuna. Ularning o‘yinini tomosha qilish zavq bag‘ishlaydi. Biz buni ham Chempionlar ligasida, ham Bundesligada ko‘rib turibmiz. Ular doimo hujum qilishadi, raqibdan qo‘rqishmaydi va gol o‘tkazib yuborishsa ham, undan ko‘prog‘ini urishlariga ishonishadi. Butun dunyo aynan shunday futbol ko‘rishni istaydi», — dedi Kafu.
Ma’lumot uchun, ayni paytda «Bavariya» Bundesliga turnir jadvalida 30 turdan so‘ng 79 ochko jamg‘argan holda yaqqol peshqadamlik qilmoqda.
