«Vilyarreal» hujumchisi Jorj Mikautadze «Manchester Siti» a’zosi Rayan Sherkini «Barselona» yulduzi Lamin Yamaldan ustun deb hisoblashini ma’lum qildi.

Gruziyalik futbolchi Sherki bilan 2025 yilning yoziga qadar «Lion» safida birga to‘p surgan. Keyinchalik fransiyalik futbolchi «shaharliklar» safiga, Mikautadzening o‘zi esa Ispaniya chempionatiga yo‘l olgan edi.

«Bunday futbolchilarning o‘yinini tomosha qilish juda yoqimli, ammo Sherki Yamaldan yaxshiroq. Rayan har ikkala oyog‘ida birdek ajoyib o‘ynaydi. Lamin esa faqat chap oyoqda kuchli, o‘ng oyog‘ini ishlatishga harakat qilsa-da, farqi seziladi.

Sherki gol urishni biladi, maydonni juda yaxshi ko‘radi, golli uzatmalar beradi va standartlarni qoyilmaqom ijro etadi — u hamma narsani qila oladi», — deya Mikautadzening so‘zlarini keltirmoqda Footmercato.

Ma’lumot uchun, Rayan Sherki yaqinda «Manchester Siti»ning «Arsenal» ustidan qozonilgan g‘alabasiga (2:1) o‘z goli bilan munosib hissa qo‘shgan edi.