Madridning «Real» klubi markaziy himoyachisi Din Xyoysen La Liga doirasida «Alaves» ustidan qozonilgan g‘alabadan (2:1) so‘ng o‘z taassurotlari bilan o‘rtoqlashdi.

Alvaro Arbeloa shogirdlari Kilian Mbappe va Vinisius Juniorning gollari evaziga muhim uch ochkoni qo‘lga kiritishdi. Biroq uchrashuvning ikkinchi bo‘limida madridliklar o‘z darvozalari oldida raqibga bir qator golli vaziyatlar yaratish imkonini berib qo‘yishdi.

Xyoysen o‘yindan keyin bergan intervyusida jamoaning o‘yinidagi barqarorlik yetishmaganiga e’tibor qaratdi:

«Biz o‘yinni yaxshi boshladik, ammo ba’zi vaziyatlarda darajamiz pasayib ketdi — bunday holat yuz bermasligi kerak. La Ligada g‘olib chiqish qiyin bo‘lishini bilamiz, ammo biz oxirgi soniyagacha kurashishga majburmiz», — dedi futbolchi.

Ma’lumot uchun, ushbu g‘alabadan so‘ng «Real» turnir jadvalida peshqadam «Barselona»ni ta’qib qilishni davom ettirmoqda. Ammo kataloniyaliklar bitta kam o‘yin o‘tkazgan holda 6 ochkolik farq bilan oldinda bormoqda.