Londonning «Arsenal» klubi Angliya Premyer-ligasi tarixida turnir jadvalida eng uzoq vaqt peshqadamlik qilib, yakunda chempionlikka erisha olmagan jamoaga aylandi. Bu haqda Opta statistik kompaniyasi taqdim etgan ma’lumotlar dalolat bermoqda.
Mikel Arteta shogirdlari 2022/23 yilgi mavsumda rekord darajada — 248 kun davomida birinchi o‘rinni egallab turishgan, biroq yakunda marraga ikkinchi bo‘lib etib borishgan edi.
Reytingning ikkinchi pog‘onasidan 1995/96 yilgi mavsumda 212 kun peshqadamlik qilgan «Nyukasl» joy olgan. Kuchli uchlikni yana «Arsenal» yakunlab bermoqda — londonliklar joriy mavsumda ham allaqachon 200 kundan beri jadval yuqorisida turishibdi, ammo chempionlik masalasi hamon so‘roq ostida qolmoqda.
Shuningdek, ro‘yxatdan quyidagi natijalar ham joy olgan:
-
«Manchester Yunayted» (1997/98) — 187 kun (yakunda 2-o‘rin);
-
«Arsenal» (2007/08) — 156 kun (yakunda 3-o‘rin);
-
«Liverpul» (2018/19) — 141 kun (yakunda 2-o‘rin).
Eslatib o‘tamiz, ayni damda «Arsenal» turnir jadvalida birinchi o‘rinda borayotgan bo‘lsa-da, «Manchester Siti» ularni izma-iz ta’qib qilmoqda. Agar «shaharliklar» bugun «Byornli»ni mag‘lub etishsa, ochkolar bo‘yicha «kanonirlar»ga yetib olishadi.
