Лондоннинг «Арсенал» клуби Англия Премьер-лигаси тарихида турнир жадвалида энг узоқ вақт пешқадамлик қилиб, якунда чемпионликка эриша олмаган жамоага айланди. Бу ҳақда Opta статистик компанияси тақдим этган маълумотлар далолат бермоқда.
Микель Артета шогирдлари 2022/23 йилги мавсумда рекорд даражада — 248 кун давомида биринчи ўринни эгаллаб туришган, бироқ якунда маррага иккинчи бўлиб етиб боришган эди.
Рейтингнинг иккинчи поғонасидан 1995/96 йилги мавсумда 212 кун пешқадамлик қилган «Ньюкасл» жой олган. Кучли учликни яна «Арсенал» якунлаб бермоқда — лондонликлар жорий мавсумда ҳам аллақачон 200 кундан бери жадвал юқорисида туришибди, аммо чемпионлик масаласи ҳамон сўроқ остида қолмоқда.
Шунингдек, рўйхатдан қуйидаги натижалар ҳам жой олган:
-
«Манчестер Юнайтед» (1997/98) — 187 кун (якунда 2-ўрин);
-
«Арсенал» (2007/08) — 156 кун (якунда 3-ўрин);
-
«Ливерпуль» (2018/19) — 141 кун (якунда 2-ўрин).
Эслатиб ўтамиз, айни дамда «Арсенал» турнир жадвалида биринчи ўринда бораётган бўлса-да, «Манчестер Сити» уларни изма-из таъқиб қилмоқда. Агар «шаҳарликлар» бугун «Бёрнли»ни мағлуб этишса, очколар бўйича «канонирлар»га етиб олишади.
