Madridning «Atletiko» klubi bosh murabbiyi Diyego Simeone «Elche» bilan o‘yin yakunlariga to‘xtaldi. Ispaniya chempionati 32-turidan o‘rin olgan mazkur bahs poytaxt klubining 2:3 hisobidagi mag‘lubiyati bilan yakunlandi, «Atletiko» 30-daqiqadan boshlab bir kishi kam bo‘lib o‘ynadi.
«Mag‘lubiyat azobi. Maydonda qolgan 10 nafar o‘yinchi bor kuchini berdi. Barcha mas’uliyat mening zimmamda, chunki men murabbiyman. Almadaning chetlatilishi? Biz hakamlar qarorini hurmat qilamiz, bunga qo‘shimcha qiladigan gap yo‘q. Endi nima bo‘ladi? Ertaga hammasini boshidan boshlashimiz va chempionat doirasidagi shanba kungi uchrashuvga tayyorgarlik ko‘rishimiz kerak», — deya murabbiyning so‘zlarini keltiradi Marca nashri.
«Atletiko» 57 ochko bilan to‘rtinchi o‘rinda bormoqda. «Elche» esa 35 ochko bilan o‘n beshinchi pog‘onani egallab turibdi.
