Мадриднинг «Атлетико» клуби бош мураббийи Диего Симеоне «Эльче» билан ўйин якунларига тўхталди. Испания чемпионати 32-туридан ўрин олган мазкур баҳс пойтахт клубининг 2:3 ҳисобидаги мағлубияти билан якунланди, «Атлетико» 30-дақиқадан бошлаб бир киши кам бўлиб ўйнади.

«Мағлубият азоби. Майдонда қолган 10 нафар ўйинчи бор кучини берди. Барча масъулият менинг зиммамда, чунки мен мураббийман. Альмаданинг четлатилиши? Биз ҳакамлар қарорини ҳурмат қиламиз, бунга қўшимча қиладиган гап йўқ. Энди нима бўлади? Эртага ҳаммасини бошидан бошлашимиз ва чемпионат доирасидаги шанба кунги учрашувга тайёргарлик кўришимиз керак», — дея мураббийнинг сўзларини келтиради Marca нашри.

«Атлетико» 57 очко билан тўртинчи ўринда бормоқда. «Эльче» эса 35 очко билан ўн бешинчи поғонани эгаллаб турибди.