Mashhur sharhlovchi va teleboshlovchi Richard Kizning fikricha, Mikel Arteta o‘z lavozimini saqlab qolishi uchun Londonning «Arsenal» klubi bilan albatta sovrin yutishi shart.

«Kanonirlar» Premyer-ligada ishonch bilan peshqadamlik qilayotgan edilar, biroq ustunlikni boy berib qo‘yishdi — endilikda ular qo‘shimcha ko‘rsatkichlar bo‘yicha «Manchester Siti»dan ortda qolishmoqda.

Chempionlar ligasida esa poytaxt jamoasi yarim finalgacha yetib bordi va u yerda Madridning «Atletiko» klubi bilan to‘qnash keladi.

«Agar «Arsenal» yana ikkinchi o‘rinni egallasa, Arteta uchun yagona imkoniyat Chempionlar ligasidagi g‘alaba bo‘ladi. Ammo men ularni bu darajada kuchli deb o‘ylamayman. Ular «PSJ»dan yaxshiroqmi? «Bavariya»dan-chi? Arteta navbatdagi bor ikkinchi bo‘lib, o‘z ishida qolishi mumkin emas. Shunchaki mumkin emas! Agar klub rahbarlari hozir yangi murabbiy tayinlash haqida o‘ylashayotgan bo‘lmasa, demak, ular o‘z ishini yomon bajarishmoqda», – dedi Kiz Mirror Football nashriga bergan intervyusida.

Mikel Artetaning amaldagi shartnomasi 2027 yil yozigacha mo‘ljallangan.