O‘zbekiston Superligasi 9-turidan o‘rin olgan bahsda «Qizilqum» o‘z maydonida «Qo‘qon-1912»ni qabul qildi va irodali g‘alabaga erishdi.

Uchrashuv mehmonlarning faolligi bilan boshlandi va 10-daqiqada Shohruh Gadoyevning uzatmasidan keyin Toma Tabatadze hisobni ochdi — 0:1.

«Qizilqum» tez orada javob qaytardi. 22-daqiqada Shahzod Rahmatullayevning aniq uzatmasini Akmal Muzaffarov bosh bilan darvozaga yo‘llab, hisobni tenglashtirdi — 1:1.

33-daqiqada esa Fayzullo Jumanqo‘ziyevning pasidan keyin yana Muzaffarov bir urinishda to‘pni darvozaga joylab, jamoasini oldinga olib chiqdi — 2:1.

Ikkinchi bo‘limda ham mezbonlar ustunlikni saqlab qolish uchun faol harakat qildi. 52-daqiqada Muzaffarovning kuchli zarbasi to‘singa tegib qaytdi. 74-daqiqada esa Aleksiy Shchebetunning xavfli zarbasini raqib posboni qiyinchilik bilan bartaraf etdi.

Uchrashuv so‘nggi qismida mehmonlar penalti ishlab olgandek ko‘rindi, ammo VAR tekshiruvidan so‘ng bosh hakam qarorini o‘zgartirdi va o‘yin davom ettirildi.

Shu tariqa «Qizilqum» 2:1 hisobida muhim g‘alabani qo‘lga kiritdi.

O‘zbekiston Superligasi, 9-tur
24 aprel 2026 yil
«Qizilqum» — «Qo‘qon-1912» 2:1
Gollar: Akmal Muzaffarov, 22 (1:1), 33 (2:1) — Toma Tabatadze, 10 (0:1).