Madridning «Real» klubi muxlislari jamoaning La Ligadagi navbatdagi muvaffaqiyatsizligidan so‘ng o‘z noroziliklarini yashirib o‘tirmadilar. Juma kuni «qaymoqranglilar» so‘nggi daqiqalarda gol o‘tkazib yuborib, «Betis»ni mag‘lub eta olmadilar (1:1). The Touchline nashrining El Chiringuito’ga tayanib xabar berishicha, uchrashuv yakunlangach, ayrim muxlislar futbolchilarga ochiqchasiga e’tiroz bildirishgan: «Uyalmaysizlarmi, yuzingizni ko‘rsatinglar!» — deya hayqirgan fanatlar.
«Real» chempionat yakuniga besh tur qolganda chempionlik imkoniyatlarini deyarli qo‘ldan chiqardi: turnir jadvalida peshqadamlik qilayotgan «Barselona» bilan oradagi farq sakkiz ochkoni tashkil etmoqda, buning ustiga kataloniyaliklarda bitta zaxira o‘yini ham mavjud.
