«Napoli» bosh murabbiyi Antonio Konte jamoasining «Kremoneze»ga qarshi o‘tkazilgan so‘nggi o‘yindagi natijasidan mamnun ekanligini bildirdi. Bu haqda neapolliklar ustozi matbuot anjumanida aytib o‘tdi.
Eslatib o‘tamiz, A Seriyaning 34-turidan o‘rin olgan ushbu uchrashuv «Napoli»ning o‘z maydonidagi yirik g‘alabasi (4:0) bilan yakunlandi.
«Biz xursandmiz. Jamoa o‘yindan zavq oldi va muhim uch ochkoni qo‘lga kiritdi. Hozirda biz ikkinchi o‘rindamiz va raqobatchilarimizning natijalarini kutyapmiz», — deya mutaxassisning so‘zlarini keltiradi Italiya matbuoti.
Ayni damda Neapol jamoasi o‘z hisobida 69 ochkoga ega va turnir jadvalida «Inter»dan keyin ikkinchi o‘rinni egallab turibdi. Biroq, Konte jamoasi yakshanba kuniyoq uchinchi pog‘onaga tushib ketishi mumkin. Bu «Milan»ning «Yuventus» ustidan g‘alaba qozonishi taqdirida yuz beradi.
