Angliyaning «Manchester Siti» klubi yarim himoya chizig‘ini kuchaytirish maqsadida «Vest Xem» a’zosi Mateush Fernandeshni o‘z safiga qo‘shib olmoqchi. Bu haqda Football Insider nashri xabar tarqatdi.
«Manchester Yunayted»ning sobiq bosh skauti Mik Braunning so‘zlariga ko‘ra, 21 yoshli portugaliyalik futbolchiga bo‘layotgan qiziqishlar kundan-kunga ortib bormoqda. «Shaharliklar» bosh murabbiyi Pep Gvardiola jamoa sardori Bernardu Silvaning ehtimoliy ketishini inobatga olib, aynan Fernandeshni uning o‘rnini bosa oladigan nomzod sifatida ko‘rmoqda.
Mateush Fernandeshning joriy mavsumdagi ishonchli harakatlari va Portugaliya milliy terma jamoasidagi debyuti uning transfer bozoridagi qiymati oshishiga sabab bo‘ldi. Klub skautlari allaqachon futbolchining o‘yinlarini kuzatishni boshlashgan va uning iqtidoriga yuqori baho berishmoqda.
O‘z navbatida, «Vest Xem» rahbariyati moliyaviy holat va jamoaning turnir jadvalidagi mavqeidan kelib chiqib, yozgi transfer oynasida bir qator yetakchilarini sotishga majbur bo‘lishi mumkin. Fernandesh esa klubni tark etishi kutilayotgan asosiy da’vogarlardan biri bo‘lib turibdi.
Hozircha «Manchester Siti» tomonidan rasmiy taklif yuborilmagan, biroq muzokaralar mavsum yakunlangach faol bosqichga kirishi taxmin qilinmoqda.
