Англиянинг «Манчестер Сити» клуби ярим ҳимоя чизиғини кучайтириш мақсадида «Вест Хэм» аъзоси Матеуш Фернандешни ўз сафига қўшиб олмоқчи. Бу ҳақда Football Insider нашри хабар тарқатди.

«Манчестер Юнайтед»нинг собиқ бош скаути Мик Брауннинг сўзларига кўра, 21 ёшли португалиялик футболчига бўлаётган қизиқишлар кундан-кунга ортиб бормоқда. «Шаҳарликлар» бош мураббийи Пеп Гвардиола жамоа сардори Бернарду Силванинг эҳтимолий кетишини инобатга олиб, айнан Фернандешни унинг ўрнини боса оладиган номзод сифатида кўрмоқда.

Матеуш Фернандешнинг жорий мавсумдаги ишончли ҳаракатлари ва Португалия миллий терма жамоасидаги дебюти унинг трансфер бозоридаги қиймати ошишига сабаб бўлди. Клуб скаутлари аллақачон футболчининг ўйинларини кузатишни бошлашган ва унинг иқтидорига юқори баҳо беришмоқда.

Ўз навбатида, «Вест Хэм» раҳбарияти молиявий ҳолат ва жамоанинг турнир жадвалидаги мавқеидан келиб чиқиб, ёзги трансфер ойнасида бир қатор етакчиларини сотишга мажбур бўлиши мумкин. Фернандеш эса клубни тарк этиши кутилаётган асосий даъвогарлардан бири бўлиб турибди.

Ҳозирча «Манчестер Сити» томонидан расмий таклиф юборилмаган, бироқ музокаралар мавсум якунлангач фаол босқичга кириши тахмин қилинмоқда.