Angliya kubogining yarim final bahsida «Manchester Siti» klubi «Sautgempton» ustidan 2:1 hisobida g‘alaba qozonib, musobaqaning hal qiluvchi bosqichiga yo‘l oldi. «Shaharliklar»ga g‘alaba keltirgan golga yarim himoyachi Niko Gonsales mualliflik qildi.

Uchrashuvdan so‘ng jamoa bosh murabbiyi Xosep Gvardiola futbolchining namoyish etgan o‘yini va kiritgan goliga to‘xtalib o‘tdi.

«To‘g‘risini aytsam, undan bunday golni kutmagan edim. Odatda bunday vaziyatlarda qanot hujumchilari yoki forvardlar faollik ko‘rsatishadi, ammo Niko buni munosib tarzda amalga oshirdi. U ajoyib mavsumni o‘tkazmoqda.

U o‘ziga ko‘proq ishonishi va ortiqcha ehtiyotkorlikdan voz kechishi kerak. Tayanch yarim himoyachisi pozisiyasida aynan shunday shijoat bilan harakat qilish lozim. U hali yosh va o‘sish uchun katta imkoniyatga ega», — dedi Gvardiola.

Ma’lumot uchun, «Manchester Siti» final bahsida «Chelsi» — «Lids» uchrashuvi g‘olibi bilan kuch sinashadi. Final uchrashuvi «Uembli» stadionida bo‘lib o‘tishi rejalashtirilgan.