Madridning «Real» klubidan «Lion»ga ijaraga berilgan hujumchi Endrik o‘z kelajagi borasida bir qarorga kelmagan. 19 yoshli futbolchi yanvar oyida «to‘quvchilar» safiga qo‘shilgan edi — ijara shartnomasi mavsum yakuniga qadar mo‘ljallangan.

Dastlab braziliyalik futbolchi Madridga qaytishini va yana «qaymoqranglilar» tarkibidan joy olishga harakat qilishini aniq aytgan edi, biroq endilikda uning fikrlari avvalgidek qat’iy emas.

«Agar «Real»ga qaytish kerak bo‘lsa — jon deb qaytaman. Agar boshqa biror joyga yo‘l olishga to‘g‘ri kelsa — demak shunday bo‘ladi», — deya hujumchining so‘zlarini keltirmoqda Madrid Universal.

Intervyu davomida Endrik fransuz tilini faol o‘rganayotganini ham ta’kidlab o‘tdi. «Lion» safidagi 18 ta uchrashuvda yosh iqtidor egasi 7 ta gol va 7 ta golli uzatmani o‘z hisobiga yozdirib qo‘yishga ulgurdi.