Мадриднинг «Реал» клубидан «Лион»га ижарага берилган ҳужумчи Эндрик ўз келажаги борасида бир қарорга келмаган. 19 ёшли футболчи январь ойида «тўқувчилар» сафига қўшилган эди — ижара шартномаси мавсум якунига қадар мўлжалланган.

Дастлаб бразилиялик футболчи Мадридга қайтишини ва яна «қаймоқранглилар» таркибидан жой олишга ҳаракат қилишини аниқ айтган эди, бироқ эндиликда унинг фикрлари аввалгидек қатъий эмас.

«Агар «Реал»га қайтиш керак бўлса — жон деб қайтаман. Агар бошқа бирор жойга йўл олишга тўғри келса — демак шундай бўлади», — дея ҳужумчининг сўзларини келтирмоқда Madrid Universal.

Интервью давомида Эндрик француз тилини фаол ўрганаётганини ҳам таъкидлаб ўтди. «Лион» сафидаги 18 та учрашувда ёш иқтидор эгаси 7 та гол ва 7 та голли узатмани ўз ҳисобига ёздириб қўйишга улгурди.